Sa Festa MannaBeata Vergine del Rimedio

Su matessi criadore

In su terrestre unu die,

Profitizzeidi a tie

Pro reparare s'errore;

A faccia a su traidore

De s'inimigu infernale.

Su profeta Isaia

In s'Antigu Testamentu,

Profettizzat su portentu

De su nomen de Maria,

Chi sutta pes giugher tia

Cuddu dragone infernale.

Tue istesti s'eleggida

in sinu de Anna perfetta,

Palma sa pius eletta

De s'eternu instituida,

Senza mancia cuncepida

De peccadu originale.

Sa divina provvidenzia,

Pro sa prima Eva ingannada,

Maria istesti giamada

Arca de sa discendenzia:

Mamma de ogni incremenzia

Non nde hat naschidu uguale.

Rosa nada senz'ispina

Sole candidu e perfettu,

Muntagna de oro nettu,

Vera istella mattutina,

Prenda rara diamantina,

De su regnu celestiale.

Cuddu ispiritu divinu,

Falesit a su terrestre,

Verga de sole celeste

T'imprimesit in su sinu,

E fit su verbu divinu

Verbu subranaturale.

Nos tenet semper in memoria

Cuddu altu verbu divinu,

De s'errore su giardinu

Balanzesit sa vittoria,

E si abberzesit sa gloria

In su die pasquale.

Abbrazzesit sos affannos

Cussu Deus umanadu;

Ca fit su Chelu serradu,

Pius de battomizza annos

E appaghezis sos dannos

De sa frutture fatale.

S'anghelu a boghe sirena,

T'hada inie annunziada;

Beneitta e laudada,

Ave de grassias piena:

Ses sa sublime terrena

Casa a Gesus virginale.

De custu celeste Anzone

Istesti mama e guida,

Chi fattesti sa naschida

Pro sa morte e sa passione,

E suffrezis in persone

Rughe e dolente pugnale.

In sa morte e passione

Mama istesti dolorosa;

Ma pius fortunosa

Ti cantesi Salomone;

De s'umana nassione

Ses reina imperiale.

A sa lughente aurora

Tottu a pregare accudides:

Sa chi giamesit Davide,

Sa turre liberadora;

Sa suprema intercessora

De su Deus immortale.

Dai levante a ponente,

D'australe a mesudie,

Tottue giamana a Tie

Ogni affligidu e dolente

E cunzedis frequente

Grassias ispirituales.

In sos mares agitados,

Paras tempestas e bottos,

Sos marineris devotos

Ti giamant disisperados;

E cantos si sunt salvados

Preghendedi liberale.

Bona parte de s'universu

In dogni altare ogni coru,

"Mater Regina Angelorum"

Cantan innos in progressu,

E ti festeggia inmessu

De sa terra munduale.

De entu, fogu, abba e nie

Ses iscudu e ses consorte,

E in s'ora de sa morte

Tottu giamamus a tie,

Pro ti tenner unu die

Mama in sa celestiale.

Ses vera liberadora

De su chelu e de sa terra,

Ses sa paghe de ogni gherra

Ses de tottu intercessora,

E ses vera protettora

In s'eternu tribunale.

Cuddas boghes pius bellas

De noe coros de anghelos,

ti cantan in altos Chelos

Coronada de istellas;

E de pregare non mellas

Pro custa terra mortale.

Tottue ti hant titulada

In terras e in marinas,

sas Tres Personas Divinas

T'hana in Chelu incoronada,

Pura sempre immaculada

Ses oraculu eternale.

Pro te mama prodigiosa

Faghent sa solenne festa,

Prega Gesù a s'ala destra

In sa die tempestosa,

Pro chi ogn'anima penosa

Non restede in su finale.